बारामती(Baramati) हा उपमुख्यमंत्री अजित पवार(Ajit Pawar) यांचा बालेकिल्ला आहे. या बालेकिल्लातील काटेवाडी ही अजित पवारांच्या नावाने ओळखली जाते. राज्यात महायुतीत एकत्र असले, तरी अजित पवार यांना मात्र काटेवाडी ग्रामपंचायतीमध्ये भाजपचं कडवं आव्हान असणार आहे. राष्ट्रवादी अजित पवार गट पुरस्कृत पॅनल विरुद्ध भाजप पुरस्कृत पॅनल अशी लढत होणार असून उद्या (५ नोव्हेंबर) रोजी मतदान होणार आहे. गेल्या कित्येक वर्षांपासून काटेवाडी ग्रामपंचायतही पवारांच्या ताब्यात आहे, हीच ग्रामपंचायत काबीज करण्यासाठी भाजपने व्यूहरचना आखली आहे.
अजित पवार(Ajit Pawar) यांनी राष्ट्रवादीत बंड केल्यानंतर आमदारांचा एक गट शिंदे-फडणवीस सरकारमध्ये सहभागी झाला. यामुळे राजकीय वादळ उठलं. शरद पवार यांची समजूत काढण्याचा प्रयत्न अजित पवार यांच्यासह समर्थक आमदार आणि नेत्यांनी कायमच केला आहे. परंतु, शरद पवार हे त्यांच्या निर्णयावर ठाम असून ते एकटे सत्तेच्या विरोधात लढत असल्याचे चित्र बघायला मिळत आहे. महाराष्ट्रात दोन हजार ग्रामपंचायतींसाठी निवडणुका लागल्या असून त्याचं मतदान उद्या होणार आहे. काटेवाडीत अजित पवार विरुद्ध भाजप अशी लढत बघायला मिळत आहे. गेल्या कित्येक वर्षांपासून काटेवाडी ग्रामपंचायतीवर अजित पवार गटाचे वर्चस्व आहे.
हेच वर्चस्व मोडीत काढण्यासाठी भाजप पुरस्कृत गटाने शड्डू ठोकला आहे. महायुतीमध्ये अजित पवार हे शिंदे आणि फडणवीस यांच्या सत्तेत सामील आहेत. तरीही ग्रामपंचायत निवडणुकीमध्ये अजित पवारांना एकटं पाडण्यासाठी भाजपने व्यूहरचना आखली आहे. बारामती तालुक्यातल्या ३१ ग्रामपंचायतींसाठी मतदान होणार आहे. एकूण १३५ मतदान केंद्र असतील तर जवळपास ७०० ते ७५० कर्मचारी ३१ ग्रामपंचायत निवडणूक केंद्रांवर असतील.