पंडित नाथराव नेरळकर यांनी संगीताचा समृद्ध वारसा दिला; मुख्यमंत्री उद्धव ठाकरे यांची श्रद्धांजली!
मुंबई, दि. 28: पंडित नाथराव नेरळकर यांच्या निधनाबद्धल मुख्यमंत्री उद्धव ठाकरे यांनी शोक व्यक्त केला आहे. देशातील विविध नामवंत पुरस्काराने गौरविलेल्या नाथरावांनी मराठवाड्यात संगीत प्रसाराचे केलेले काम कधीही विसरता येणार नाही. त्यांनी घडविलेले शिष्य त्यांच्या गायन आणि संगीताचा समृद्ध वारसा पुढेही चालवीत राहतील असे सांगून मुख्यमंत्र्यांनी पंडित नेरळकर यांना श्रद्धांजली वाहिली आहे. पंडित नाथराव नेरळकर यांचे आज ह्रदयविकाराने दोन वाजेच्या सुमारास निधन झाले. त्यांच्यावर आज सायंकाळी 5 वाजता पुष्पनगरी स्मशानभूमीत अंत्यसंस्कार करण्यात आले.
मराठवाड्यामधील संगीत क्षेत्राचा सूर अबोल झाला – अमित देशमुख
मराठवाड्यातील जेष्ठ गायक तथा शास्त्रीय, उपशास्त्रीय आणि भावसंगीतकार पंडित नाथराव नेरळकर यांच्या निधनाने मराठवाड्यामधील संगीत क्षेत्राचा सूर अबोल झाला, या शब्दात ज्येष्ठ गायक पंडित नाथराव नेरळकर यांना सांस्कृतिक कार्य मंत्री अमित देशमुख यांनी श्रद्धांजली वाहिली आहे.जेष्ठ गायक तथा शास्त्रीय, उपशास्त्रीय आणि भावसंगीतकार पंडित नाथराव नेरळकर यांना सांस्कृतिक कार्य मंत्री अमित विलासराव देशमुख यांची श्रद्धांजली
देशमुख आपल्या शोकसंदेशात म्हणतात अनेक शिष्य घडविणारे संगीत गुरू अशी पंडित नाथराव नेरळकर यांची ओळख होती.
नाथराव नेरळकरांना ‘श्रेष्ठ गायक-अभिनेता’ पुरस्कार , ‘कलादान’ पुरस्कार , ‘उत्कृष्टता’ पुरस्कार , ‘औरंगाबाद भूषण’, ‘चतुरंग’ प्रतिष्ठानचा पुरस्कार तसेच २०१४ साली संगीत नाटक अकादमीचा पुरस्कार अशा अनेक पुरस्कार/ सन्मानांनी गौरविण्यात आले होते.संगीत नाटक अकादमीची फेलोशिप मिळवणारे नाथराव हे मराठवाडय़ातील पहिलेच कलावंत होत. नाथरावांच्या निधनामुळे मराठवाड्यातील संगीतविश्वावर शोककळा पसरली आहे. नाथराव नेरळकर यांना भावपूर्ण श्रद्धांजली !