नागपूर : “स्वातंत्र्याचा अमृत महोत्सव” अंतर्गत डॉ. वसंतराव देशपांडे(Dr. Vasantrao Deshpande) यांच्या स्मरणार्थ, दक्षिण मध्य विभाग सांस्कृतिक केंद्र(South Central Division Cultural Centre), नागपूर दरवर्षी संगीत महोत्सवाचे आयोजन करते. येत्या 30, 31 जुलै आणि 1 ऑगस्ट 2021 रोजी संध्याकाळी 6.00 वाजता “30 व्या डॉ. वसंतराव देशपांडे स्मृती संगीत महोत्सव” आयोजन करण्यात आले आहे. कोविड-19च्या संसर्गाच्या प्रतिबंधात्मक निर्बंधामुळे मागील वर्षीप्रमाणे यंदाही हा महोत्सव व्हर्चुअल ऑनलाईन माध्यमातून साजरा होत आहे. या सोहळ्यात शास्त्रीय गायन, वाद्य, नृत्य आणि नाट्यसंगीताची सादरीकरणे असतील. अशी माहिती दक्षिण मध्य विभाग सांस्कृतिक केंद्र, नागपूरचे संचालक डॉ. दीपक खिरवडकर यांनी पत्रकार परिषदेत दिली.
1 ऑगस्ट रोजी लोकमान्य टिळक पुण्यतिथीचे औचित्य साधून यंदा या कार्यक्रमात ‘स्वातंत्र्याचा अमृतमहोत्सव’ साजरा करण्याचा दुग्ध शर्करायोग जुळून आला आहे. दक्षिणमध्य विभाग सांस्कृतिक केंद्राच्या वतीने स्व. लोकमान्य टिळक(Lokmanya Tilak) यांचे पुण्यस्मरण करण्यात येत आहे. 30 व्या डॉ. वसंतराव देशपांडे स्मृती संगीत महोत्सवाचे उद्घाटन 30 जुलै, रोजी सायंकाळी 6 वाजता केंद्रीय मंत्री नितीन गडकरी(Union Minister Nitin Gadkari) यांच्या शुभ हस्ते होणार आहे. या प्रसंगी ज्येष्ठ संगीतकार आणि गुरू पंडित नारायणराव मंगरुळकर आणि माजी उद्घोषक व अखिल भारतीय रेडिओ नागपूरच्या लेखिका श्रीमती प्रभा देउस्कर यांना सन्मानित करण्यात येणार आहे…
३० जुलैचे प्रथम सादरीकरण पंडित जयतीर्थ मेउंडी यांच्या शास्त्रीय गायनाने होईल. मराठी आणि कन्नड भाषिकांना सुपरिचीत, अनेक पुरस्कारांनी गौरवान्वित पंडित जयतीर्थ मेउंडी आपल्या आवाजाच्या जादूने यावेळी रसिकांना मंत्रमुग्ध करणार आहेत. ३० जुलै रोजी व्दितीय सादरीकरण पद्मश्री पंडित भजन सोपोरी “संतूर वादन” करणार आहेत. पंडितजींचा जन्म श्रीनगर (काश्मीर) येथे काश्मीरमधील प्रसिद्ध सुफी घराण्यातील’ विशिष्ट पारंपरिक संतूर वादक संगीतकार कुळात झाला. त्यांची परंपरा तीन शतके 9 पिढ्यांपासून अविरत सुरू आहे.
31 जुलै 2021 रोजी शनिवारी प्रथम सादरीकरण “शास्त्रीय गायन” चे श्री अनिरुद्ध देशपांडे सादर करणार आहेत. व्दितीय सादरीकरण मध्य प्रदेशातील उज्जैनच्या डॉ. पल्लवी किशन आणि त्यांच्या ग्रुपतर्फे ‘कथक नृत्याचे सादरीकरण होणार आहे. तृतीय सादरीकरण बासरी जुगलबंदी पंडित प्रवीण गोडखिंडी आणि श्री शादज गोडखिंडी यांचे होणार आहे.
रविवारी 1 ऑगस्ट 2021 रोजी हा संगीताचा कार्यक्रम श्रीमती संपदा माने आणि सहकारी ‘मैफील नाट्यसंगीताची’ हा संगीतमय कार्यक्रम सादर करणार आहेत. या कार्यक्रमात डॉ वसंतराव देशपांडे, पंडित बाळ गंधर्व, पंडित जितेंद्र अभिषेकी आणि पंडीत दिनानाथ मंगेशकर यांच्या नाट्यगीतांचा आस्वाद घेता येणार आहे…
दक्षिण मध्य विभाग सांस्कृतिक केंद्र, नागपूर आणि सर्व अद्यतनांसाठी फेसबुक https://www.facebook.com/SCZCC/, ट्विटर https://twitter.com/SCZCC आणि इंस्टाग्राम https: // www .instagram.com/sczcc.culture/?hl=en शी संबंधित सर्व माध्यमाशी आपण जुळू शकता.. आपणास विनंती आणि आग्रहाचे निमंत्रण आहे की सर्वाधिक संख्येने या ऑनलाइन कार्यक्रमात सहभागी होवून दक्षिण मध्य विभाग सांस्कृतिक केंद्र, नागपूरच्या या उपक्रमाला भरघोस प्रतिसाद द्यावा.